1937年，爸媽和我兩位姊姊。

   阮姊妹仔講媽媽毋是廣交、活潑的個性，哪會交陪著幾若个好朋友？阮知的就有四五位。

其中兩位，媽媽和in結拜，做姊妹。一位阿梅阿姨，是媽媽少女時的厝邊。媽媽佮伊學做衫；後來靠這个工夫幫贊家庭。

阿梅阿姨結婚後蹛（tuà，住）台中，身體無啥好，罕咧見面。毋過伊的後生，阮叫阿兄的，放假就愛來阮兜（tau，家）；伊讀淡江英專（現今的「淡江大學」）的時，會展兩句英語，講伊大學生活，參加舞會，佗一齣電影的男主角提銃出來的動作偌媠氣等等，予阮遮的讀國校仔的表小妹聽甲目睭大大蕊。連伊共樹奶糖哺哺咧歕（pûn ，吹）雞胿仔，我都感覺伊真厲害。我第一遍哺「白雪公主」樹奶糖，就是伊買來的；我佇台中公園用紙網仔撈金魚，也是伊tshuā（帶）阮去的。

後來我才知影伊愛來阮兜，主要是因為大姊。伊甚至共同學講大姊是伊的fiancée（未婚妻）。敢講先「號」先贏？阿梅阿姨嘛向望大姊會當做伊的新婦；毋過後來的發展無照按呢行。

媽媽另外一位結拜姊妹我較有印象，伊蹛佇彰化，叫做金枝，嘛是媽媽少女時的厝邊。伊確實是金枝玉葉，是我人生第一个熟似的好額人。

金枝姨丈也是做木材，爸爸和兩位也佇彰化的同業tshuā某囝出去旅行的時，姨丈有時也會做伙去。媽媽家己的老母無去矣，共契母——金枝阿姨的老母，當做老母有孝，行查仔囝的禮數；契母生日一定會送豬跤麵線，六十大壽的時，手頭雖然真絚（ân，緊），猶是想辦法攢十二𣛮（siānn，有把木箱，可挑）的禮品，豬跤麵線、紅龜粿、罐頭、衫料等等，對員林送到伊彼當時蹛的所在，閣倩「大鼓吶」一路拍鼓，歕鼓吹。媽媽講：「阮阿兄也一路綴（tuè，跟）咧放炮仔，彼款勢面袂輸人嫁娶。」

陪綴有錢人，媽媽真忝（thiám ，累），好咧收禮的會加減硩（teh，回禮）紅包，「彼回阿媽硩我30箍；過無偌久，來員林，閣予我30箍，講莫予我了傷濟。」

可見60箍猶比媽媽開的較少。

契母來員林，蹛阮兜，媽媽也一定好禮仔款待。「伊慣勢食好，穿好，我著煮伊佮意的菜，泡好茶，也著買檳榔予伊食。」

有時媽媽會怨嘆，講親生查仔囝的金枝阿姨對老母無啥好；竟然予伊一人蹛庄跤。

阮的年代無聯考，第一輪省立學校招考，第二輪縣立，第三輪私立；每一輪kan-na會當報一間學校。我小學畢業彼年，老師信心滿滿，親身tshuā前四名的學生去彰化女中應考。無人知影我會暈車，彼是我第一遍坐汽車，自員林到彰化半點鐘，我頭眩目暗，閣吐

甲真狼狽；結果除了我，另外三人攏考有牢。 

後來去考第二輪的縣立學校，爸母就誠緊張，提早一工tshuā我坐火車去金枝阿姨in兜蹛兩暝。彼是我第一遍親身體會著有錢人的生活。

金枝阿姨的厝是兩層樓，前門對大路，後門向巷仔，足開闊；連浴間都大甲予我真欣羨。

樓仔厝二樓的欄杆是用花矸排的，徛佇走廊，會當欣賞樓跤一大片的花。花園的花，十花五色。我第一遍看著大理花，就是佇遐。

阿姨兜有煮飯的、摒掃的、種花的，竟然也有專門做衫的師傅。媽媽講彼位羅漢跤無某無猴，佇阿姨兜，免煩惱食穿，共一家人做衫，涼涼仔，袂歹過日。

阿姨的兩个查某囝真媠，雖然我兩个阿姊也人人呵咾；毋過in皮膚幼閣白，笑聲響亮。我大漢了後感覺彼可能是有錢人才有的氣質，因為自信。

講起來真心適，金枝阿姨也有一位後生迷著阮媽媽一个查仔囝。彼陣，我已經來台北食頭路，聽講彼位當咧做兵的表小弟，放假的時會來阮兜蹛兩工；去等小妹下班，兩人才去冰果室約會（彼的年代，員林猶未有咖啡廳）。閣共阮媽媽講：「阿姨，我來做恁的親情好無？」伊已經結婚的的阿姊真濟年無看著阮小妹，閣撥工來員林一逝；也佮意阮小妹，講兩人有匹配，共阮媽媽講：「阿姨，我來共阮媽媽講，咱好來準備矣。」

這位表小弟，喙甜，自細漢阮爸母就疼伊，大漢了後，人活潑，也緣投；毋過做囝婿，爸母無啥贊成，講伊有較奢華，人遐爾活潑，恐驚伊無定性。

所以，這个親事也無做成。

經過遮濟年，阮講起古早代誌，小妹講伊結婚後，有一日和妹婿轉去厝，誠拄好，彼位無緣的表兄也來佇阮兜，裕隆仔車停佇外口。媽媽歹勢歹勢，含糊講in是同事啦。伊看會出彼位騎鐵馬來的查埔人和小妹的關係，直直看，「阮有代誌先走，行到大門邊矣，伊猶對冊房看出來。」

看小妹佮意的是啥款人，好佇佗？

妹婿毋捌伊，毋過有感覺著彼款目神的意思，講：「開裕隆仔的！」表示無共看在眼內，彼款車無稀罕。「無想講家己騎鐵馬。」小妹愛笑。

媽媽嘛足好笑，咧歹勢啥？歹勢無予伊做囝婿？毋過媽媽講in是同事嘛無毋著，小妹和妹婿是同事結緣。

媽媽善良、深情，才會交陪著幾若个知己，連in的後生來阮兜都真自然、自在。

講倒轉來，媽媽一生的勞苦，一部份也是因為厚禮數，閣顧面子。家己過日明明無冗剩，猶拍拚攢十二𣛮的生日禮物去送契母！這毋是一般人會做的代誌。

  2025.7月號《文訊》