真濟人會看著目睭內有蠓仔咧飛，彼叫做『飛蚊症』。

阿貴講伊拄仔（剛）有這个症頭的時，足煩，足鬰卒；聽著我的經驗了後，才放心和這个症頭和平共存。「一寡症頭佇（tī，在）靜娟面前，攏變無事。」

無毋著，你不時去想伊，就是予伊補充氣力、能量；莫去管伊，伊感覺無心適，鼻仔摸咧，就走去矣，袂閣和你膏膏纒。我是按呢想的。

其實，40外歲拄仔有飛蠓症的時，我嘛足煩惱。逐日目睭褫（ thí，張）開，對白白的天蓬，就看著幾若隻蠓仔飛來飛去；讀冊、看稿，in也一定來亂。有時，欲確定蠓仔飛走無，就一遍一遍用手掩一蕊目睭，看壁，抑是看天；結果，無奇蹟，蠓仔猶佇咧。看眼科，也無改善。一位醫生講：「飛蠓症無關係，機器用久，總是有毛病；就親像壁紙貼久會膨起來，壁猶好好就無要緊。」

講是按呢講，我猶是真困擾。後來，一位老醫生共我講伊的飛蠓症已經超過三十年；毋過，照常共患者做目睭的手術。有影，目睭的手術遐爾幼路（精細），目睭內有蠓仔咧飛，都無影響，我驚啥！有編輯同行目睭內飛的毋是細細隻的蠓仔，是烏豆仔、胡蠅，甚至是一條一條索仔呢！

無去共關心，漸漸就無感覺蠓仔的存在。

九一記者節，照例記者聯誼會有辦慶祝大會，電視、報紙各種媒體攏會參加。也有廠商提供的摸彩品；獎品袂少，甚至有跤踏車、相機和電視機，唌（誘）逐家去參加大會。但是，有條件，抽著獎品的人，若無佇現場，就算放棄。

一年，慶祝大會佇新生報對面的實踐堂舉行。遮爾近，萬一摸著好物件，煞無去，敢毋是足冤枉？我按呢講，一个少年的同事笑甲目睭微微，講：「去啦，去啦，你會摸著『捕蚊燈』！」