一早先喺安比高原的牧場survey，發現呢度有得打我大學時期打的木球呀！好高興喺第二個地方見到比公眾玩~~呢個牧場，喺冬天時係一個滑雪的熱點，佢有好多條滑雪道，而家無雪，就生晒草，綠油油，幾咁清新怡人呀！

呢度仲有好多小動物，剛出世的豬BB，羊咩，綿羊，馬，兔，牛仔，駝鳥．．．當然唔少得黑白雙併的牛！親親大自然哦！

睇完呢個地方即刻坐兩個小時車去青森。

SantaApple蘋果園：第一次見到蘋果樹，而且係好多好多好價錢的日本蘋果樹，而家係收成期，所以啲蘋果又大又紅又靚，呢度連最貴的「世界一」都有，要貴10000yen一個架！之後仲去埋蘋果汁同果Jam的加工場，個老闆仲好好人，一人送我地一小瓶蘋果蜜、提子蜜同埋甘荀蜜比我地，呢啲蜜喺香港我都未見過，佢可以直接塗麵包食架！禮尚往來，我地都送佢TVBuddy電話繩！haha

之後我地去咗津輕的一個服務站，睇景＋食飯！我真係不得了，因為無帶錢落車，要問導演借，比佢知道我的惡行．．．買唔停手！哈哈！但我買時成日都掛住我阿媽同家姐，呢樣佢啱食，呢樣佢又可能會想食．．．絕大部分都係佢地，我似出錢做運輸同帶水貨多啲！最後仲買左一小箱九個的富士蘋果，雖然未係最大個，但好平！600yen咋！

食埋飯，我地又再起行去青荷溫泉。

青荷溫泉：係一間無電，用油燈照明的溫泉旅館，房間無電制，要出去浸溫泉，就要用手動的電筒啦！不過啲溫泉好有傳統日本feel，有一個仲係對住瀑布，我試過一次之後已經愛上左露天溫泉啦！呢度過多一個星期就會周圍都係紅葉，知到時會係點呢？期待！

十和田湖：係一個坐電動船賞紅葉的熱點，環境好靚，如果自己嚟，可以租用鴨仔或者恐龍造形的小船，同愛人出海賞紅葉，好浪漫耶！而附近仲有一間神社同埋一條開運小道比人祈福！原來而家喺日本好流行power shot呢樣野，咩嚟？其實就係廟、神社之類，因為無年青人去，所以改個勁啲的名，咁就吸引到好多人後生仔女去攞power啦！日本人真係有計！

是夜，我地去左奧入瀨溪流附近一間好大的酒店，呢間酒店將會為我地拍攝提供蘋果餐，而今晚我又再去浸溫泉了！明日要一早喺酒店附近survey，所以要早啲休息，希望有覺好瞓，尋晚比翻譯Teresa的強勁的鼻鼾聲，搞到我瞓唔到．．．可憐．．．（今日金滿先生話我邊程車都瞓，梗係我俾Teresa的鼻鼾搞到無覺好瞓，所以要喺巴士瞓返夠本！我點好意思話係，但老實講，係！）

早抖啦！

P.S.>>>>

而家開始，我個行李已經有一半係手信啦！大鑊！