今日瞓醒一覺，就發覺窗外傳來怪聲，一打一睇，好多海鵰呀！因為酒店直情喺正海邊的上面，海鵰就會飛到來窗邊休息休息。

今日第一站係坐兩個幾鐘去到岩手縣。

JR溫泉：一個車站內竟然有一間溫泉，溫泉內仲有紅黄綠燈提大家車仲有幾多分鐘到站，無論幾趕，都可以浸個順腳溫泉，過癮耶！

天然珪沙溫泉：就係用溫泉的蒸氣令沙熱起嚟，之後埋個人入去啲沙度。

對滝閣：係食水魚的地方，喺日本食水魚係好貴價的食物，男人食咗可以壯陽，勁！女人食可以補充骨膠原，正！不過今日我地無得食，只係睇下個環境，最搞笑係大廳有一個用竹整成的公仔，佢有個好勁的．．．！嘩嘩嘩！食完就會變成咁？意思係要買過啲大碼褲啫！wakaka！

再坐兩個多小時車去葛卷高原牧場。

葛卷高原牧場：本來係出名好多的小岩井牧場的，但因為自從啲宮崎牛有口蹄症之後，就唔比人去，我地唯有揀呢一間啦！海拔六百幾米，氣溫明顯低幾度，cool！去到試咗最最最original的牛奶，好濃好香的！之後，我地多謝人地帶我地周圍行，就送佢六嬸個仔「TVBuddy」的電話繩比佢，人地反請我地一行五人食雪糕！好好味！

又再坐個幾小時去到用地下溫泉蒸氣來染布的地方。

八幡平地熱蒸氣染色：用紥染的方法染布，起初真係覺得無咩特別，好多東南亞同大陸的藍印都會用的方法，但係呢度好明顯睇到紥染染出來的顏色，清好多，顏色變化多好多，原來係靠地底一千多米的地熱蒸氣，將染好的布蒸走混濁的顏色！

最後我地坐差不多一個小時的車程去到安比高原一間好靚的酒店過夜，晚餐食左一個岩手牛肉的韓式燒烤！「愛斯愛斯」！喺香港不甚食牛肉，甚至覺得怪味的我，來到日本決定豁出去呀！

明天一早就喺呢個地方survey！

今日的車程都好幾個小時，太累了！但係浸溫泉的確令痛咗兩個星期的尾龍骨無咁痛！係咪真係有神奇功效？定係我心情放開左啲？