今日12:11以HK$1.36沽清10,000股422越南製造加工出口；
以HK$1.27加碼買入10,000股126達成集團。

如果係一個理性投資者，一定會話我做錯事。
因為今日大跌市，達成集團係十大跌幅榜內，明顯超級弱勢；
越南製造加工出口反而係十大升幅榜內，明顯超級強勢。
如果做買賣，應該沽出達成集團止蝕，追入越南製造加工出口，提升回報。
當然，如是者，會好擔心15:20越南製造加工出口中途停賽，係為咩股價敏感消息，因為完全未有任何路邊新聞出現。
（唔通變身，唔做電單車？）

不過，我亦非完全非理性，因為當初買入達成集團，係因為佢手上有9億股1668華南城（將會o係9月30日掛牌），等同每股達成集團擁有0.7867股華南城。
HK$1.27一股達成集團，即使其它淨資產當控股Discount去唔計，等同每股華南城值HK$1.61，即招股價HK$2.1 o既76.87%。以呢期破底情況計算，已經係合理價格。
相反，越南製造加工出口雖然每股NAV達US$0.189（約HK$1.46），兼業績見底反彈，畢竟股價近月已升近五成，如無新消息，勢見回吐整固。

另一方面，即使控權股東真係賣盤，都未必大炒。好似274高寶綠色股東完全出售股權，股價亦只可以微升一格，唔似之前升親都五成以上。

o黎緊一年內o既新股，我最期待AIA同現代教育，因為相信兩隻都係用o黎收用長擺床下底都唔錯o既股票。