來來來，看看看，

坐車看風景，坐船看海湧，買珠寶就愛來這揀。

一年三百六十五工，

今日尚好空。

有外好空咧？

恆春到台東，不是，

是日本的飛龍機載珠寶來台灣。

(啊！是載啥物珠寶到台灣？)

就是這條真珠披鍊，你來看嘜咧，

看你是要配洋裝，也是配套裝，高尚又閣真大方，

不管是叔公做生日，嬸婆咧做忌，也是拜拜走廟寺，

這條真珠披鍊戴起來是介舒適！

(按怎賣？)

一條十萬，毋免！八萬，毋免！

如果你一遍若買三條，算你十萬又閣打九折。

(佇日本毋賣，那有可能拿出來台灣遮賣，一定是假兮啦！)

啥物假的，

洗面洗耳空邊，掃地掃壁邊，買布看布邊 ，

若欲買真珠，看這證書面頂寫的ハイカラ(海卡拉)日本字，

看予清、看予明、看乎詳細，

樹頭徛予在，毋驚樹尾做風颱，真材實料ㄟ啦！

這真珠圓輾輾，光澤(こうたく、Koutaku)遮呢阿好，按怎是假ㄟ啦！

(如果是真的，哪會提出來佇這哩賣？)

你煞毋知啊！

日本的頭家跋輸筊，

飼的粉鳥攏飛了了，

不正會削價拚現金，勘得了。

這位奧樣你眼光實在有介好，

這幾條真珠項鍊足適合汝家己，

猶有恁查某囝佮大家，

紅媠黑大範，青的顧人怨，

保證你戴起來媠噹噹，

查某囝明仔載嫁好尪，

大家身體老勇健，

歲數加活幾若冬。

(好啦！買三條，算我較俗一點也)

頭家已經是俗賣拚負債！

已經是俗甲咧褪褲阿啦！

也無，送你一塊日本進口的茶箍，

予你沙必使啦！

阮佇這也有兼賣雜細，

胭脂、膨粉、鈕扣、應有盡有。

不管有買無買，

阿義仔佇這攏是，

「真」心的祝福，「珠」事多如意，

若有需要就愛趕緊來買喔！