5.蘇州人
係第二天去故宮玩既期間識左呢一個蘇州男人,因為佢都係一個人所以大家就一齊玩,同佢一路玩就一路傾好多中國既事,佢講左好多關於服兵役既事比我知,玩到中途我就開始唔想跟佢一齊玩,因為佢體能太差,入到頤和園時佢已經話好累唔想行,我當然唔會理佢啦,之後要上山佢話要走,我當然堅持要睇完所有風景啦,所以我就叫佢走先,但佢就留低陪我上山,不過一路行一路話辛苦,講真當時我真係想叫佢快些走不要阻礙我,到左夜晚佢叫我明天跟他一起去長城,但我就用一些藉口拒絕了,因為我始終覺得佢會阻礙我既行程!

6.日本女仔
有一日旅館既人同我講黎左一個日本人,不過我都無理會係乜人,不過因為我住既旅館係做本地人生意,突然連續出現我呢個香港人同日本人令佢地好新鮮似的,之後有一個朝早我準備出去玩時見到有一個女仔同職員唔知傾乜,之後個職員叫左我過去,原來呢個女仔就係佢地講既日本人,個女仔因為同個職員言語不通所以要我幫手,同個女仔了解過之後原來佢只係想繼續係到住,之後佢想要去一個地方但唔識去,職員就迫我帶佢去,當然我呢個好客既人亦為左表達中國人既熱情同加深中日友誼我絕對會帶佢去任何地方啦,相信識我既朋友都知道我咁做同佢係一個日本女仔無關!當我帶到佢要去既地方之後佢不停同我講野,不過我都唔識聽日文,佢既英文又仲差過我,但佢又好似一定要同我講某d野咁,所以我打比我家姐叫佢幫我翻譯,原來佢只係好想多謝我,就係咁大家就分手!到左第2日我原來打算今日唔去玩好好休息一下,因為日日不停去玩都好累的,點知一早就有人拍門,一開門就係呢個日本人,佢打算約我今日一齊出去玩,我當然立即答應之後出去啦,原來呢個女仔係一個大學生,讀歷史的,佢今次黎中國去睇既係中日戰爭既野,佢對呢段歷史好有興趣,不停問我呢d野,大家既交談就係靠有限既英文,佢既志願就係想成為一個教師,佢對香港人知道咁多日本野感到驚訝,不過佢知道我有聽日文歌之後話唱首比我聽我仲驚訝,我同佢有一日發生左一件事好好笑,就係佢有一個防狠器,有事就會響,有汽車防盜咁響,果次佢個開關掉左出黎,所以不停響,但係我地又唔知係邊到掉左,所以周圍搵,但又搵唔到,所有人望住我地,之後我地完全無辦法,呢個時候見到有架公安車,我地就行左過去搵公安幫手,佢地初頭見我地係外國人唔多想理我地,後來知道咩事之後就對個防狼器好有興趣,之後幫左我地拆左佢令佢唔再響!後來呢個女仔要去哈爾濱,但北京既天氣佢都已經頂唔順,佢話估唔到咁凍同埋唔想帶咁多行李所以無帶好多衫黎,佢頸巾都無就想去哈爾濱,真係驚佢會凍死,所以我就迫左佢去買衫之後第日佢就去左哈爾濱,事後我返到香港知道呢個女仔返左去北京同曾經搵過我,不過我已經走左~

7.網友
出發前有一個網友在天津,她知道我在北京之後她叫我去天津玩,所以我去了天津找她,佢非常之熱情,帶我係天津周圍玩,而且幫我安排晒所有事,住宿呀之類~介紹左一班大學生比我識,事後知道原來果間大學係大陸有名既大學!

8.室友
住係天津一間大學入面當晚,房間只有一個室友,佢係一個高中生,黎呢間大學考升學試,佢讀美術,而且佢擁有一個特別既名字,姓冷單字一個冰,真係一個好cool既名,當佢知道我係香港人就不停同我講英文,就算我答佢中文佢都要用英文同我傾,我地傾nba,但係因為譯名不同既關係每次都要諗好耐先知佢講邊個!

9.記者
係北京其中一個室友,初頭覺得佢神神秘秘,原來係一個政治記者,佢問我好多關於中國歷史既事,到第2日就發現佢周圍同旅館既人講話我呢個香港青年對中國既認識太少,唉.......第2日我返到去旅館之後竟然發現佢放左一本毛語錄係我張床到,分明想引我睇,不過我既好奇心令我真係睇左一大本毛語錄,亦因為咁我學識左好多簡體字,事後我仲偷睇埋佢一封信,佢寫信比人大委員會喎,真係一個奇人......有一次我問佢”雷鋒”係乜,佢竟然將佢既一生所有野講晒出黎,佢背晒人地既一生,無得頂呀佢!