聖誕假期間，睇咗《色．戒》。

好多朋友睇過話好睇，但個人覺得呢部電影有啲被過譽了。

究竟係張愛玲，定係李安關係？冇睇過原著，唔知。

在下第一次接觸李安作品係《喜宴》，最近當然係《色．戒》，但始終睇過唔多佢嘅作品。要在下形容，佢係一個好導演，係一個嫻熟而且商業上成功嘅電影導演。

李安將自己好好地隱藏喺影片中，手法生活化，平民化。

然而，或多或少俾在下一種「唔一定要呢個人去拍」嘅感覺。講白啲，係冇乜個人風格。

愛玩影像又超有個人風格嘅，華人導演中首推王家衛。

「唔知佢講乜」，聽過唔少人咁講佢嘅戲。同時，有部分講過呢句嘢嘅人，會唔知點解又鍾意佢嘅作品。

《２０４６》可謂一套大爛片，唔介意拍／剪得耐，最介意係真係好爛。

在下唔鍾意《花樣年華》，但套片絶對唔係爛，重有不少可取之處。可能覺得佢開始過份賣弄手法賣弄鏡頭，先冇太鍾意。

到今日為止王大導為在下最欣賞嘅作品，係《重慶森林》，亦係在下至今為止少數（可能係唯一，有待返家考證）上架嘅華語電影。但李安嘅，到而家都未有個想要買。