早前有７折所以買咗個Collector Set，其實之前都唔肯定要唔要買（至少我之前揀咗《兩生花》），Ｎ年前喺國際台睇過，唔明佢講乜，亦唔覺得有幾好睇。至於今次買，主要係唔想嘥咗張Coupon，而買Collector Set，係因為而家租碟都會租到，不如要租唔到嘅版本。至於真正揀呢套片原因，除咗係自己好想睇啲未有之外，不外乎又係我嘅外語片啟蒙老師阿鏵（算唔算呢，始終真正令我開始去睇去揾嘅係奇斯洛夫斯基）。阿鏵第一張請我畫嘅劇照，就係呢套。

我睇咗Director Cut, 所以未知同上世紀80、90年代放映版差距喺邊。遲下先再睇另外個版本。

故事講述二次大戰後意大利西西里一個小鎮，去戲院睇戲係當時好多人唯一娛樂；戲院有如教會，所放映嘅戲，冇任何大胆鏡頭，就連錫面珠登戲都會被删。小孩Toto跟電影放映師Alfredo,因為對電影熱愛而結下有如父子一樣嘅友情。Alfredo教年幼嘅Toto去操作放映機，包括剪接技巧，同時亦不時提醒Toto佢嘅人生唔係只係操作放映機。一次意外火災，Alfredo成為盲俠，行動亦不便，Toto成為新戲院嘅放映師，由於新經營者已經唔係神父，電影尺度自然放寬。

Toto長大後，繼續做放映師，亦有自己拍短片。遇上一見鍾情嘅Elena，但遭對方父母阻撓，Toto又要服兵役，加埋啲鹽呀醋呀，兩人分開又無法聯絡。Toto心灰意冷，Alfredo就叫Toto要永遠離開家鄉，發生任何事都唔好返來。

Toto一去30年，成為咗一個成功嘅電影人，因為Alfredo過世而重回家鄉。後來遇上一個同Elena一樣嘅女仔，得知Elena同佢一個舊友結婚生子。二人雖再相逢，但一切已成往事。最後，影片以Alfredo送Toto嘅一份禮物作結。一切，都係電影之愛。