今日響唐人街見到《南極物語》，唔駛講，梗係唔會放過啦！

上次講《8 Below》時都提過呢部原版，係我好細個時睇，有Ｄ地方唔太準確，今回可以順便修正一下。

故事可分為三部分。第一部分係人同狗之間的互動，第二部分係狗狗求生記，第三部分係講返到日本的兩個人類主角。第二同第三部分係撈埋一齊。《8 Below》都保留左呢個分佈。不過我會盡量唔同《8 Below》比，因為即使今日翻看，仍然覺得呢套原版好好多。

1958年，日本第一個南極探險隊基地裹面，除左人之外,重有二十隻「樺太犬」（其中一隻狗媽媽待產中），由於雪車唔係好妥，就響狗群中揀左十五隻夠稱又精壯的出來，帶住考察器材同三位隊員（包括兩位主角潮田同越智一齊出發，期間大家一齊上刀山落油鑊（鏡頭內重可見唔少大自然生態及景象，重會見到人響企鵝堆中等等）。到左目的地，插完國旗放低紀念品後，折返基地期間，三位隊員都因為雪盲症，又冇通訊器材而告遇難。於是放走響南極長大的狗兄弟太郎同次郎，希望佢地返到基地拖馬。結果當然不負所托啦！

返到基地的隊員好快復原，狗媽媽亦生左幾隻狗仔，大家都準備返去，等待第二隊到來接手。然而，由於天氣惡劣要提早收工，加上時間及飛機重量問題，唯有將十五隻狗狗留低，等第二隊來照顧狗狗們。然而，第二隊待命期間，任務被取消。潮田同越智後悔將狗綑得太緊，希望可以返去救狗；探險隊亦唔想咁快放棄。但破冰船無法前進，潮田同越智想飛返去，但燃料同食水不足，潮田同越智唯有帶住沉痛心情隨隊返國。

天氣惡劣，人類朋友又唔見左，狗狗們都好驚。有狗狗挨唔住，亦有掙脫狗鍊的：領導犬力奇、太郎、次郎、獨行俠風連小熊、傑克、小白、安哥，同埋泰利。

飢寒交迫，狗狗們響斷裂冰塊中覓食（因為冰塊移動,將原先水底結冰生物推上來），泰利唔小心掉左落水，冰塊移位上唔返來，然後俾冰塊夾住淹沒。狗狗們又會群毆海豹仔，醫下個肚。冬天到來，響冇太陽的南極，狗狗們俾極光嚇親，傑克驚得濟自己發狂走左，緊接而來風連小熊又唔跟隊，自己留響碎冰一帶。後來小白跌落山谷，重傷走到之鯨魚骨下等死。安哥同同伴失散，隨浮冰上返回大陸。力奇、太郎同次郎繼續旅程，遇上殺人鯨，為救太郎次郎而同殺人鯨隻抽。逃出生天但重傷之下終於都挨唔住。返到基地，太郎、次郎重遇風連小熊同安哥。佢地獵小海豹期間，安哥（可能）被海豹咬住佢條長狗鍊，拖左落水，沉左落去......之後風連小熊又自己走人。

太郎、次郎再返基地。

返國之後，探險隊因為棄狗而被彈劾遣責。潮田因內疚辭去大學教授職務，開始走訪狗狗們屋企人向佢地道歉，又將響南極出世的小狗做賠禮，又後悔當時冇返去毒殺狗狗，唔駛佢地響當地折磨而死。越智沉醉工作中，乍似冇事，但又無法磨滅對狗狗們既感情。潮田同越智見面，悟出狗狗們生命並非掌於自己手中，人類冇權如此殘害生命。

越智未婚妻帶來第三次出征南極探險隊消息，鼓勵越智加入。潮田、越智再赴南極。見過傑克的屍體，返回基地又多找到其他，包括越智自己最愛鍚既五郎。之後，太郎、次郎出現，人狗重逢。

《南極物語》係一套催淚彈電影。唔講話D狗點挨，寫人方面幾實在（例如探險隊裹面唔會有自以為是既地質學家）。影片開頭第一部份，人同狗之間互動寫得好好，為往後潮田同越智離開南極後既描寫舖好條路,而唔會流於表面。而落難狗狗就更加唔駛多講，狼狽非常又楚楚可憐。

誠意推薦，但千祈唔好諗呢套片虐待左幾多隻狗.... （如果大家記得《子貓物語》）.... 所以千祈咪諗......