話咁快又一年，過埋今年，教左…8年書，嗯…

正如上年的決定，又入返特殊學校教書，呢一年都係好努力，盡全力，總算有回報，有得續約，但過程絕不輕鬆。

可能自從上年做左人老豆之後，真係心裡多左一份莫名的負責感(亦可以話係壓力…)，令我無論遇到任何事，都要撐落去，點辛苦都要頂住。我覺得壓力來源唔應該來自家人，其實只係純粹想自己屋企可以過得更好，所以有能力的時候，我都拼盡，冇計較(但其實某程度上都係計較，係為左保住份工地唔計較lor…)

自從上年既慘痛經驗，我今年真係好似驚弓之鳥一樣，好難信任人，好唔實在，好似工作既地方周圍都係鬼，個個都好似會害我……心理壓力係前所未有咁大!我係度做野既目標好似就只有保住份工，好驚做錯野，好驚得罪人，真係好辛苦……因為我唔想自己同埋家人又承受多次痛苦……

其實教書係咪咁既呢?其實都8年，正常的話呢個年資應該已經perm左，我都唔係咁想同人講我有呢個教學年資，因為我唔覺得自己係一個有經驗的老師……究竟我係度做緊乜?

呢8年來，我覺得好似係度被強行由一個學生調整至出黎工作既成年人模式，我諗做學生既年代我自己都算乖，起碼都算專師重道(不過其實細心諗返都不完全係，容後再講)，教書既現實就係同自己做學生既情況好唔同，係多樣性，大概可以分三個層面:學生、家長、同事(包括老細)

學生方面，有一件事令我至今都好難接受，就係我第一個月返工，竟然有學生當住全班面前向我講粗口，我好記得當日佢係講「ON9」，佢仲大大聲，狡辯話自己講英文「O」同埋「N」咋喎!真係，我至今都冇辦法過到呢一段經歷，一個學生真係唔應該向老師講粗口，然而，現兜兜就有一位學生係我面前向我講，仲要係當住全班同學面前講，我真係覺得好委屈，我咁辛苦讀個師範、實習，到頭來竟然係有人咁樣傷害自己，呢個係咩世界?咁多年來我都問呢段經歷點解發生係我身上，或者可能我都做過不尊重老師的行為，例如以前中四、五上英文堂，覺得個老師教得唔好，咪成日伏低上堂什至訓覺，有時仲拎個MD機黎聽歌添...或者呢d真係輪返自己去承受……我又記得，有個學生當住全班面前駁我咀，當時上音樂堂，其實我只係覺得成班好嘈，叫極都唔安靜，我就大聲問全班「你地有冇尊重過音樂?」我咁樣問係因為覺得佢地凡係上音樂堂都係心散，不及其他主科上堂咁樣咁合作，點知有個同學又係大大聲回我一句「咁音樂有冇尊重過我地呢?」或者只係一句唔經大腦既辯駁，係無理的，但係我真係覺得好嬲，而又唔識點樣回應，因為我冇諗過有人係咁無賴……我呢8年都受唔少學生氣，真係唔好講話我對學生應該點有愛心啦…有時真係望快d涯走佢畢業，但然而頂心頂肺既學生只係不斷入學……對我黎講，我未隊死佢地已經係最大的愛心……

到家長，真係有時學生有問題，其實好多時都係沿自家長身上，有點樣既老豆老母就有點樣既仔囡。我最憎就係當住仔女面前挑戰老師既家長，佢地認為自己永遠係對的，自以為自己讀過書，比以前自己既老豆老母有修養，就成日都想插隻手係自己仔女教育，但其實佢地係唔信任學校，破壞行政指引，只係識得為自己利益搵著數既人渣而已，佢地永遠都唔會知道應該點做先至對佢地仔女係有益的;仲有另一類，我稱之為廢物冇負責心的家長，要描述佢地簡單，佢地既思想係咁的:只要擺個仔女係學校，等老師教好佢地，咁就完成了…其實仔女既成長，有一半係學校，有一半係屋企，家長係有絕對責任，真係一俾個學生知道原來個老豆老母唔會理佢D野，你估佢地會唔會自己學到好既野呢?白痴都知道唔會啦!...所以呢，呢8年來的家長，真係為我將來繼續做人父母時樹立一個反面教材。

同事方面，我真係覺得同事先係做野時最令我反感既人物…做學生既年代，同做野既年代，最唔同既地方，就係待人處事方面既手法，做學生我自問可以用純真、真我既方式去對人，會有朋友;工作就好唔同，原來大人既世界係互相猜疑，唔可以用真既自己去見人，老細係接受唔到人地既過失，唔信任人，一班團隊總係要分共黨立派，明爭暗鬥，真係明明平時上堂、對住D學生，課後對家長都已經做到死，都仲係要自己友鬥一餐……我做野做到今日，成日都覺得唔知自己幾時會冇左份工，最大感受就係唔知幾時又有人害我，佢地唔會理我係屋企有大有細，佢地話知我死，係度搵人情味係不可能，呢度只有不公平、不理解先係最合理的，所以工作既地方我真係好難搵到真心對自己好既人…

其實只係做左8年，我覺得自己已經千瘡百孔，傷痕累累，我好想變返一個BB仔咁樣受傷有人錫返，有人照顧，夢想我一早已經放棄左，我依家只係想有份穩定的工作，我好希望係幾年內可以有返一個perm位，俾返自己個家一個穩定收入，唔洗再擔驚受怕……要我愛上教書係不可能的，不過要我認真、投入都仲係可以的，希望可以繼續加油!起碼…學會放低過去……