七八个bat（曾）鬥陣上畫圖課的朋友去咖啡廳開講、畫圖。

有的人畫相片，有的人現場畫室內抑是室外的風景。蠟筆、鉛筆、水彩隨在人佮意。出門，攏是紮（tsah，攜帶）輕便的；幾若个畫水彩的，共佇39箍商店買的金屬名片盒仔當做水彩盒，空心金屬鈕仔黏佇內面貯（té，裝）水彩顏料。好紮好用，畫出來的圖也若專業的。

我畫圖輸in（她們），毋過我的水彩盒仔是專業的。

伊比我的手較細，外殻深藍色，「帽仔」提起來，兩扇白「門」拍開，就看著十二格顏料；邊仔閣有附細枝筆、海綿和貯水的扁盒仔。欲收起來的時，兩扇「門」合起來，「帽仔」戴起來，就恢復束結束結（小巧結實）的原形。這是為出外寫生設計的用品。我提出來用的時，逐家攏講伊足讚 ，會當拗，會當伸，親像「變形金剛」。

有人奇怪我竟然會用遮爾（tsiah-nī這麼）專業的物件，我講彼是一位畫家送的。

有一年，六七个文藝界朋友去仰光開會兼旅行，其中一个畫家，也是我的好朋友玉蕙的先生一路看，一路畫，一日就畫一本；我也綴（tuè，跟）咧一路佩服，一路欣羡。伊彼个牛頓牌的水彩盒仔我是第一遍看著，感覺伊設計了足好。可能是我五六日內對伊的圖呵咾甲觸舌，也可能伊欲鼓勵我這个畫圖新手，轉來台灣前，竟然慷慨共伊送予我。

聽我講這个經過，阿碧講，「你的人緣一定真好。」

毋是人緣好，是緣份啦。

彼日，我畫過咖啡廳內底兩三个怪型的杯仔、矸仔了後，想無啥好畫，就畫家己的帆布袋仔。有人認真看，講伊結實，大細也拄好（tú-hó，恰好），真適合出來畫圖的時用。

確實，伊囥（khǹg，放）八開的畫圖紙拄仔好，我上課的時慣勢提伊。一時風神，我講，「帆布包也是人送我的。」

三個月前，十外个同窗鬥陣食飯，雪麗提一个帆布袋仔予逐家看，講笑，「這个袋仔有媠無？恁攏m̄ bat（不識）字，kan-na（只）靜娟有咧寫字畫圖；所以這个袋仔送伊做冊包，算是物盡其用。」

厚厚的帆布包是咖啡色，一隻粉紅仔色的鳥仔兩肢跤向天倒咧，面頂英文字寫DON’T  DESPISE  ME。意思是毋通輕視/討厭我。

毋通輕視/討厭我？到底是代表鳥仔抑是揹的人咧講話？若是揹的人的心聲，敢毋是表示伊無自信？後來我想著較好的講法，用華語講是『不要小看我』；用台語是「毋通看貓的（麻子）無點。」意思是「點真濟」啦。

想遮爾濟，真幼稚。不過，按呢想，揹起來感覺較有自信，行路有風。

阿碧閣再講一遍，「可見你的人緣真好。」

遮爾甜的呵咾予我歹勢，毋敢講我的帆布包內底猶有別項人送我的物件。貯車票、銀角和貯箸、湯匙兩个小袋仔，是一个朋友手工做予我的。伊甚至紩（thīnn，縫）一个提燒的物件用的布套予我；毋是一般的手套，是雞母型，真古錐，我毋甘用，共伊當做手藝品；有特殊感情的。

伊做予我較大件閣上實用的是兩个大布袋仔；日本布，一个烏色，一个鳥鼠仔色，面頂的花草攏真雅氣。伊也講予我做冊包，毋過，我出外應酬、開會才甘咧用；揹伊，時常有人呵咾。有人問我彼是佇佗位買的，我淡薄仔聳勢（神氣），講，「無地買啦，朋友做予我的。」伊怨嘆，「我哪會無這款朋友！」

著啊，毋是我的人緣特別好，是我好運，交著遮的熱情、慷慨的朋友啊。

2018.12月號《文訊》雜誌